Наградата “Браќа Миладиновци” за најдобра поетска книга меѓу два фестивала е востановена во 1963 година. Браќата Димитар и Константин Миладинови се познати хуманисти и книжевни дејци од 19 век, родени во градот Струга. Постариот, Димитар Миладинов, бил учител и собирач на народни песни и приказни, а помладиот, Константин, е попознат како поет. За време на своите студии во Москва тој ја напишал познатата песна “Т’га за југ” што е симбол на фестивалот. Оваа песна традиционално се чита на повеќе јазици при свеченото отворање. Браќата Миладиновци трагично го завршуваат својот живот во отоманските затвори, во кои попаднале заради својата културна и образовна дејност.

Од 1963 наградата “Браќа Миладиновци” важи за најпрестижна годишна национална награда за поезија во Република Македонија. Наградата е досега доделувана 43 пати по распишан конкурс.